ألو .. ألو .. ألو ..
وطني .. حبيبي .. عمري .. أرجوك ما أسمعك بلكي تعلي الصوت
أسمع رصاص و بچي وعبر الأسلاك الدمع يوصل وريحة موت
أسمع صياح ولغط ومناداه يا هَل الربع خل نرفع التابوت
أسمع عياط ولطم وأم تنعه يا هلَ الولد يلغربت بسكوت
ويل چنت وكت المسه بيدك تگود الگمر وتصيرله زاتوت
ويل چنت شمعة عرس من تنطفي الكهربة خدك يضوي بيوت
وچان الدرب يستحي ويلوذ من خطوتك لو ردت مره تفوت
مـاخـاف لـيل اليجي مادام في معصمي يوليدي تضوي بتوتْ.
ألو .. ألو .. ألو ..
مــاأســمعـك يـاوطـن بالخط إجت وشوشه وإرتفع صوت القصف
وصوت أَبو يگل للولد : شـد روحـك بعـتبتك يـولـيدي لا تنخطف
البارحه أعلنوا :
مجموعه ذبحت شمس والصبح شفنه الصور نشرتها كل الصحف
وأنباء أخرى إجت عن إغتيال النهر من سَيَّرْ إعله الجرف
والثالثه عن حقل حرگوا ا ثيابه ومشوا والحال ما تنوصف
ومن قبل أول أمس طَوقوا بيت اللغه وباگوا ا بقايا الحرف
شدينه إيد الشرف والطيب والمرجله وأطلقنه إيد العنف
ألو .. ألو .. ألو ..
يمكن الخط إنقطع .. مَيْؤَوسْ من هل الوضع ماينصلِح هالظرف .
ألو .. ألو .. ألو ..
آسف ولا ينسمع والصوت مو الأولي الصوت أحس مرتبكْ
ذبـلان ورد الحچي بشفافك ومنكتل من حقي لو گمت أشكْ
آني عـرفـتك كبل من تحچي ينزل رطب والدنيا تمطر ضحكْ
وبكلشي أشوفك تهل حتى الصبح من يجي ويه الشمس تشتركْ
وما چان واحـد كبل ياخذ رگبتك غفل لو صار وكت العركْ
وما بالَغِت لو گلت چنت أويه موت اليجي لو زامطك تشتبكْ
والآن ياموطني :
دنگت لأصغر قزم والچان يحلم كبل يوصل الحَد الوركْ
معقوله ياموطني إتخلي الگمر ينذبح وسِتْر الشمس ينهتكْ ؟
ألو ..ألو .. ألو ..
وطني .. حبيبي .. عمري ..
چن بلهاتك جَرِحْ من تحچي أحِسْ مختنگ
شــايل بچفك نــهـر مـيت ونخله إنكـتل مـــــــابـين إديـهـا العثگ
شايـل بچفك وطــن مذبوح من كل كتر وبثوبـه ريحة حــرگ
مـن چنت أبـوسك كبل خـدك يوَرِد هـوى ومـثل الگمر تعتلگ
والآن ياموطني :
دم بلبل براحِتك
يابس وريحة بجي توصلني كلما تمر نسمه إعله جثة العشگ
هم شفت كبلك وطن كتاله شعبه وزرَع بثيابه مِيَة فتگ ؟
كلشي اعله هاي الأرض
جذبه زرعها الوكت بس أنت وحدك صدگ .
ألو.. ألو .. ألو ..
وطني .. حبيبي .. عمري ..
الليله كاس الحزن أرد أشربه بصحتكْ
مرت سنه من قهر وسنين راحت تجي وأنت على حـالتــكْ
دورت بين الصور گلت ألگة بلكت ولو شي باقي من ريحتكْ
وفجأة :
إتفَجِرَتْ قنبله مزروعه وسط الصور والدم ترَسْ راحتكْ
ودخان عالي إرتفع ما گمت أمَيّـز بعد رجليك من هامِتكْ
كتلوك ياوطني أهل الوجوه الصفر واللي گرط ملحِتكْ
گابلني شيل النعش أرد آني أدفنك وأرد أحچيلهــــــم قصتكْ
لكن غريب الأمر:
إشلون أدفن ضوه وياگاع تگدر تلم ياموطني جثتكْ ؟