من روائع الشاعر العراقي المبدع علي الجبر

1
گال : بس انت انتخبني
ومن افوز …….
بعد ما اسكت أبد
وشوف شراح اسوّي
للبلد
گلت : هذا يبين رويحة
حلال ، وطيّب وهبّ ريح
ويصون الـ عهد
انتخبته … وفاز
وما شفته بعد
غير بس مرّه وحيده
چان بـ المجلس يصيح
بصوت عالي ورافع ايده
گلت : يا الله ، يمكن يعترض
عـ السياسي الـ باعنه
بلايه سند
وعـ القيادي الـ سلّم الـ موصل
وتكريت ، والفلوجه ، وديالى
وبلد
وعـ الرئيس الـ ما گعد
وعـ الـ وزير الـ باگنه
بـ ساعه وشرد
والـ وزيره الـ فاسده
من الـ مهد
وعـ الاحزاب الـ نايمه
بـ نص الـ شهد
وعـ الاسعار الـ عاليه
بلايه حسد
وعـ النهب والـ بوگ
والاكل الـ فسد
وعـ القضاء الـ صار بيد
شعيط ومعيط وضمد
وعـ الاعلام اللّعب بيه
جوله سعد
وعـ الشيوخ الـ صاروا
بلايه عدد
وعـ الزعاطيط الـ ولونه
ونهبوا الـ چا والـ لّعد
طلع …….
محصور ويريد يروح
للـ حمّام ، يستفرغ معدته
ويرجع يچمل الـ عدد
لا …. والـ وعد

2
يا برد
فدوه روح ولا ترد
عدنه بـ الجبهه جنود
ونازحين عله الـ حدود
وعدنه عـ الساتر حشد
وانت تدري يا برد
خيمة الـ نازح تراري
لا تصدّ ولا تردّ
والهوى يحلّ ويشدّ
وصوبة الـ جندي تفگته
والـ غطه عظم وجلد
يا برد
هاك كل هذا الـ ورد
وهاك روحي الـ دافيه
وهذا الـ قند
وهاك گلبي الـ منمرد
وهاك كل سنين عمري
الـ ماشفت بيها حقد
بس …..
عليك الله ابتعد
ولاترد.

3
بعد قانون الـ عشاير
نريد قانون الـ خمط
يحمي نوّاب الـ فساد
الـ نهبوا آبار الـ نفط
***
ونريد قانون الـ نفاق
للفروخ وللرفاق
الـ دمروا كلّ الـ عراق
ولفطوا الـ ديره لفط
***
ونريد قانون الـ تآمر
والـ تجسّس والـ تخابر
يحمي تجّار الـ منابر
الـ خبطوا الـ وادم خبط
***
ونريد قانون الـ وكاحه
والـ صلافه والـ گباحه
يحمي ثوّار الـ خرط
***
ونريد قانون الـ عماله
يركب الـ حقّ والـ عداله
ويحفظ چياس الـ زباله
ويشفط الـ غيره شفط
***
ونريد قانون الـ هضيمه
يحمي ابطال الـ هزيمه
الـ فرشوا بلادي وليمه
ورجّعونه للقحط
***
ونريد قانون الـ صنم
ينظّم اصوات الـ غنم
بخانة الـ إي والـ نعم
ويربط الـ نعجه ربط
***
ونريد قانون الـ حرس
يفرض علينه الـ خرس
ويشد الـ صوت بجرس
والـ يخالف ينشنط
***
ونريد قانون الـ نهب
يحلب الـ دوله حلب
يحاسب الـ مگرود
والـ ماعنده والـ ماله ذنب
وينصر الـ يحلف چذب
ويربط الـ فقره ربط
***
بعد قانون الـ عشاير
ضرطت وشبعت ضرط

4
لا تدوخ
هيّ خربانه وحگ
ربّ الـ فروخ
باچر تصير انتخابات
واتفل بـ گصتي
اذا ما رجع مختار الـ عصر
والـ نجيفي ، وصالح ، وعمّار
وچلاب الـ شيوخ
وعود روح الـ ساحة الـ تحرير
وتظاهر صلوخ
ولا ترد لمّن تفوخ
5
احترگت اسرائيل
گلنه : هذا الله زعل
من شافهم منعوا اذانه
وهاي حوبتنه ودعانه
واحنه بـ الجمله نموت
وحتّى عزرائيل
عزّل من ورانه
أمّدانه ……
لا حظينه بـ عيشه زينه
ولا تقدّمنه وتطوّرنه وبنينه
ولا شبعنه من الـ مهانه
ولا خلصت الوادم
من طلايبنه وأذانه
أمّدانه